天生就係一個悲觀消極既人.. 點算.. ?

Posted by

Sharing is caring!

好多人認為樂觀係一種性格、或者睇事物既態度 ,   天生 ,   改唔到的。但至少在我身上 ,   我可以從極度消極悲觀 ,   變成 80% 樂觀。我相信你都可以。

 

你有幾悲觀 ?


由中 2-3 開始 ,   我就變成一個 90% 悲觀既人。

而家諗反 ,   應該係關家人、社會環境、同自己轉牛角尖事。

任何事 ,   我都會不斷諗有咩問題可能會出現、最壞既結果會係咩等等。即使按照事情發展 ,   照計點都唔會去到好差的 ,   但我都好怕會有意外發生 ,   杞人憂天。

就連我背脊有粒墨 ,   我以前都會驚俾人見到而恥笑我..   WHAT THE FUCK MATE ???   (咁當然 ,   邊會有人咁得閒笑我有粒墨..  咁你明啦 ?  好多悲觀都係杞人憂天。)

仲有一排我不斷係到諗 “死”  ,   因為我覺得我既人生好差 ,   亦唔覺得自己會有一個好美好既將來,   咁不如早死早著。但你要明白 ,   作為一個學生 ,   人生可以差得去邊 ?   其實咪又係自己太悲觀 ,   成日諗到自己好差之嘛..

之後因為我每日都活得好無趣、好痛苦、好絕望 ,   所以有睇過精神科醫生 ,   但完全冇用。

咁你既悲觀去到咩程度 ?   可以o係 Comment 到分享下。

 

悲觀係你自己訓練出黎的


有句野我以前成日講的 ,   就係 : “如果真係咁咁咁..   咁點算 ?

我諗所有悲觀既人都會有類似既說話 ,   E D 說話其實係表達緊你好悲觀 ,   成日覺得身上發生既都只有壞事。

E D 說話看似普通 ,   似係想保守一點 ,   令自己唔好期望過高 ,   從而失望。但卻係我地慢慢變得悲觀、唔開心既原因 ,   因為你係o係到為好多中立既事創造緊無限個悲慘結局  ,   你係o係到訓練緊自己成為一個悲觀既人

你回想下人生中發生過既事裡 ,   有幾多真係出現你所 “驚” 既結果 ?

  • 考 speaking 唔合格
  • 做錯野俾人發現
  • 身體檢查 Check 到有絕症

其實可以話有 70%+ 既情況下都唔會發生你所諗既結果的 ,   係你諗太多喇小傻仔..   如果係咁的話你仲成日晒時間諗到咁負面做乜 ?   我知你想保守一 d ,   但保守唔係咁樣的。你可以樂觀同時保持保守既態度。

 

你根本就唔係天生悲觀的 , 你仲驚乜 ?


我都曾經以為我係一個天生悲觀消極既人  (Or 太過感性 lol) ,   無可否認 ,   有 D人係天生比較悲觀 (感性) ,   但只會佔整個性格既一小部分 ,   可能係 5% ,  10% ,  或頂多 20%。唔會有人一出世就 100% 悲觀消極的。

你諗下細個讀幼稚園小學既時候 ,   會唔會諗自殺 ?   會唔會覺得自己係零 ?   會唔會成日覺得其他人比自己優秀好多 ?

好少好少..   即使你同學仔彤彤數學考試次次拎 98 分 ;  而你每次都係岩岩合格 ,   你都只不過會覺得佢好勁 ,   但絕對唔會去到好悲觀、甚至要自殺既果種狀態。會令你成日拎人做比較、成日覺得自己好癈、唔夠人叻、搞到你好悲觀好想自殺既從來都唔係你自己 ;  而係你家人同朋友。

其實你會由 10% 悲觀變成 90% 悲觀 ,   只不過係你成日用你既幻想力 ,   將所有遭遇都諗成負面 ,   慢慢鍛鍊而成的。

樂觀 開心

既然你都唔係一個天生悲觀消極既人 ,   做咩要諗到樂觀好似遙不可及咁呢 ?   其實只要你願意改變 ,   幾悲觀既人都可以變回一個樂觀既開心小兒童 

想做反一個小朋友 ,   擁有反 90% 樂觀開朗既性格 ,   你需要既係一個方向探索能力、同自制力

但如果你依然覺得自己係冇得救、或者覺得好難改變而唔想改變的話 ,   I DON’T CARE  I REALLY DON’T  亦唔想理你咁多   係你自己一世唔開心之 ma    關我托 7 

 

Sharing is caring!

2 comments

  1. 你好,有一個問題想請教你,關於性格敏感嘅。我大個之後好多時會留意人地用嘅字眼,呢樣野係自從做左閱讀理解開始…
    而發現我屋企人成日用啲好mean嘅說話稱呼or踩低我,例如我講少少個人意見唔岩佢地聽,就話我廢話。放左舊紙巾,自己唔記得掉,佢地提我,就叫我掉埋你自己去。又試過病個陣,肚好痛,屋企人只係不斷比建議我做咩做咩,但係無關心我依家係幾痛做唔到,我一唔聽佢地講,就話你中意死就死,痛都係你痛飽佢,關我咩事。
    因為咁,有時候同事或朋友,我同左佢地咁講件事,佢哋會話好彩無發生係自己身上姐,無咩同理心咁,我就覺得點解佢地咁講野。佢哋會話一直只係我敏感,都唔覺得自己有咩mean同無禮貌,覺得我諗太多或有部分覺得,香港人就係mean,你都無辦法解決,哂時間轉牛角尖,慢慢就疏遠我。
    我想問可以點解決?呢啲係咪同悲觀有關?但我由細到依家,都從來係我屋企人身上feel唔到愛,一直比較容易怪責自己係咪我做得差。可以點好…謝謝

    1. 唔係請教..   係互相學習 XD

      我唔覺得你個情況關悲觀事。係 ,   你可能性格比較敏感、感情比較細膩 ,   所以會好留意人地講既一言一語 (me too ) ,   但咁唔係好事咩 ?   因為咁先真正係一個有感情 / 感受既人。

      至於你屋企人 ,  而家好多家長教仔既方法係 :  打 / 鬧 / 迫。 佢地以為鬧就係 “教緊” 佢地 ;  但唔知原來講緊既 harsh 野其實係破壞緊佢地既 self-esteem 。佢地潛意識會慢慢覺得o係屋企人面前都做得咁差 ,   咁o係其他人面前更加唔會做得好 ,   令佢地成日懷疑自己、好多野都唔敢做 ,   因為佢地好驚做錯野..   由細就被訓練成一個冇自信既人 ,   但偏偏又想佢地成為一個成功既人 ,   完全地矛盾 ,   真係痴晒線..

      我諗你個情況有小小似。

      如果要我好簡潔咁講點做好既話 ,  我會講 “唔好理佢地” ,  因為 E 個真係你唯一可以做既野黎。我都好想講 D 好 Fancy、好 technical 既方法出黎 ,  但其實真係唔駛咁複雜。

      我覺得你可以試下學好似 Gary Vaynerchuk 成日講既咁 :  Don’t Give a Shit / Fuck.  就係 唔好太理會佢地既 “大道理”、亦唔需要對佢地既 “Mean” 太認真 ;  同時間要搵出你自己既強項 ,  增強反自信心。

      點解咁多名人 (明星、商人都好) 可以面對到咁多對自己既批評 ?  有時仲非常 MEAN 的 ,  話佢地係雞、係靠屋企、係奸商…   如果佢地將所有野都 Take it personally ,  世上應該會有更多人抑鬱同自殺。但佢地冇 ,  因為佢地好有自信 ,  佢地深知 “果 d 人” 對自己講既 “mean 野” 係癈話、係假的、根本冇需要 care e 班人傻仔講既野 ,  因為根本冇必要 !

      衰 d 講句 ,  e 班人係仆街黎 ,  如果對 d 仆街講既仆街說話而唔開心咁你就輸了。當然我唔係話你屋企人係仆街   只係有時佢地既批評、講既野係仆街、係賤的話 ,  你只需要盡量無視 ,  唔好太在乎就得了 ,  因為就係你太在乎佢地講既野先會唔開心。相信自己 ,  相信自己唔係一個佢地口中咁低劣既人就係第一步。

      當你知道人地講既野係癈話、對你冇用的 ,  就 Stop Giving A Shit About Them ,  然後 ,  你需要對自己有自信 ,  當你有自信後 ,  是真的 ,  人地講咩都唔會傷害到你。

      其實大家身邊都有 mean 人 ,  有 d 人可以唔受 mean 人傷害 ,  方法就係唔好理 e 班仆 x 。

Leave a Reply

Your email address will not be published. Required fields are marked *