1 個令你既生活愈黎愈開心既簡單方法

Posted by

Sharing is caring!

我唔記得邊個講過  “我地唔係要做到 100% 開心 ,  而係 51%”  (如果有人知係邊個講既 ,  請話我知)。

Optimized-photo-1458419375141-c4e6d931ee5a因為吸引力法則  (LOA)  話 ,  只要某樣野多 d ,  就會吸引更多果樣野反黎。只要開心只係多過唔開心 1% 都好 ,  你既人生都只會得 1 個方向 ,  就係愈黎愈開心。

你問心 ,  51% 其實真係唔係咩好大既要求 ,  但點解有咁多人都覺得 ,  唔開心支配緊佢地既人生 ?  (包括你 ?)

我搵到其中 1 個答案。

而且我亦都有 1 個解決方法。

 

點解你成日都過得唔開心 ?


個答案係 :  你太中意作故仔。你好中意為未發生既事作無數個悲慘既結尾。

例子 :  

當你升職既時候 ,  你開心左幾分鐘。之後果幾日你會唔會諗 :

  • 死啦..  升左職 d 工作量係咪會無限多.. ?
  • 唉..  之前同我爭緊 e 個位果 2 位同事 ,  都唔知會唔會 o係我背後搞小動作..
  • 會唔會忙到冇時間陪屋企人..
  • 我背負既責任係咪又大左..
  • 什至諗諗下會諗左 d 唔相關 ,  但都係慘既野..  例如女朋友冇覆機..  (証明左 LOA 已經好成功咁為你吸引更多唔開心既野 ,  你開心啦 )

 

人係中意諗到自己好慘先 “開心”   WTF

你有冇見過 1 隻貓做緊中意既野時會愁眉苦臉 ?  NO.  但我地會。

升職  (仲有好多其他野)  明明係 1 件值得開心既事 ,  但你為佢作左無限個悲慘既結尾..  你係咪真係睇得韓劇太多 ,  覺得個個遇到開心事之後都會生 Cancer ?  (我唔係成日睇韓劇 ,  如果有講錯請插我下面..  I mean..  下面 comment 插我..)

仲有 ,  所有作出黎既悲慘結尾都只係你估估下 ,  可能永遠都唔會發生添。

你既開心 ,  本來可以上升到 55%。但去到 51% 既時候 ,  為左 d 虛構故事令你趺反落 45% ..  仲衰過未發生前..  (唉..  唔通你真係嫌你既人生太過開心 ?)

咁好明顯 ,  如果你 keep 住 e 種思考模式既話  (我稱之為 “悲慘世界” ..  都係亂 up 嫁姐個名..  專家改果 d 都係亂 up 嫁喇..  佢地有時懶到用自己名添..) ,  唔開心既遭遇只會愈黎愈多 ,  但明明你可以愈黎愈開心嫁 wor..

 

我會作咩故仔 ?

我以前都好中意做悲慘既角色 ,  即使遇到開心野時 ,  都會去諗下有咩唔好既事會  “有小小機會可能”  出現。例如 :

  • 同某人剛 1 齊左時會諗 ,  佢會唔會好大洗、或者好煩 ;   而唔係諗好浪漫。
  • 買左部新電腦會諗起所有仲未裝既軟件、同遊戲 ;  而唔係諗終於玩到新 game。
  • 搵到 part time 時會諗 ,  我會唔會做錯野 ;  而唔係我終於有涼出。
  • 仲有好多好多…

你中意作咩故仔 ?

 

1 個令你愈黎愈開心既簡單方法


你希望做到既其實係好似小朋友咁 :   遇到開心既事就開心 ,   遇到唔開心既事就唔開心。小朋友唔會將 1 件開心既事諗到好悲慘的。

而且 ,   我地遭遇既事情 ,   其實大部份都值得我地去開心的。所以你會見到 d 小朋友 ,   無論有錢、無錢都好 ,   即使係玩緊舊石頭 ,   佢地都係開心的。因為佢地唔會為自己去作故仔。Sorry..  唔係唔會 ,   但會既話都係作 d 令自己開心既故仔 ,   例如我係孫悟空

想愈黎愈開心 ,   你需要做既係 :

 

STAGE 1 :  留意自己幾時會作故仔

  • 既然你會話 :   我習慣諗負面野丫 ma 你吹丫。
  • 咁好簡單 ,   你只需要習慣反去諗正面既野 🙂

你可能會覺得好難 ,   但其實只需要小小既意識就 ok 了。

方法係 :  留意自己幾時會o係開心既時候作悲慘既故事。捉到自己咁做既時候 ,   即時同自己講 :  我作果 d 故仔又唔係真既 ,  仲可能永遠都唔會發生添..  晒時間諗 d 未必會出現既野 ,  咁我都係開心左佢先喇 ;  唔開心既野 ,  等我開心完先算 lu !

如果你經常地阻止、中斷你既負面思想習慣 ,  好快就會發現 ,  你每次作故仔既時候 ,  都會自動自覺地察覺到佢 ,  而且好快就識得停止。再慢慢地會發現 ,  原來作故仔係會令你好唔自在的 ,   因為作既時候你都會從開心變到唔開心。咁就代表你已經慢慢打破 e 個習慣了。

大概 30 日左右 ,  你就會明顯地發現 ,  開心既遭遇多左好多。但其實 ,  可能只不過係你開始肯俾自己去為開心既事而開心 ;  而唔係好似以前咁 ,  開心既事都諗到好悲慘。

而你既開心比例亦會好快到達 51% ,  而你既命運都只會得 1 個 :  就係愈黎愈開心。

 

STAGE 2 :  為唔開心既事而快樂

STAGE 1  要你做到既野係 :  即管去為開心既事開心 ;  即管去為唔開心既事唔開心。

之後你慢慢會去到我而家既階段  (STAGE 2) ,  就係從唔開心既事去找尋快樂、或者得益。就咁聽落 ,  好似唔係 d 咩特別有用既野咁 ,   但其實岩岩相反。

佢係每個想成功既人都必需具備既野黎。唔開心其實就等於個宇宙同你講 :  你有野做錯了、或者你行既方向有偏差 ,  如果你去反正確既位置、用反正確既方法 ,  開心就會係理所當然。

你而家明白嗎 ?  唔明既真係請你睇多次 bold 左果句野 ,  因為佢係今篇文章既精華。

思考位  ~  思考位  ~  思考位  ~  

你遇到唔開心 ,  唔係個天想你喊 ;  而係想你從中搵到通往開心既路。如果你 1 直 ,  都淨係從中去找尋唔開心 ,  你只會不斷重覆你既錯誤 ,  即係重覆咁得到唔開心。

每次分手 ,  你好可能都會發現原來你做錯左 d 野 ,  但你唔理 ,  只會去搵更多令你既唔開心變得合理既野 ,  例如 :

  • 點解條街咁多人比我醜 ,  但佢有女朋友 ?   而 Alice 要同我分手 ?   唉..  個天好唔公平..
  • 不斷聽  “好心分手”、”垃圾”、”絕”、”戀愛大過天” , ETC..

有 Structured Thinking 既人唔係唔會唔開心 ,  分手都係會喊的 ,  但佢地多左 1 樣野。

佢地會發現自己做錯左某樣野 ,  先導致今日既唔開心。所以佢地從 e 次既唔開心搵到快樂 ,  因為下次 ,  佢就唔會再因為 e 件咁蠢既事而分手了。所以下 1 次既戀愛 ,  只會比今次黎得更轟烈、更穩固。

 

總結

你可能會有好大同感 ,  但諗真 d ,  其實你 1 早就知道 e d 野 ,  只係你 1 直都顧住從所有既事入面搵唔開心。

你想唔想好似 d 好樂觀、冇咩煩惱既人咁 ,  每日都開開心心過日子 ?  想既話 ,  我希望你可以開始做 stage 1 既野 :  留意自己幾時會為開心既事而唔開心 ,  然後即時停止 ,  去批准自己去開心下

 

Sharing is caring!

14 comments

  1. 多謝你的文章。無意中在網上睇到你的blog,所講的內容讓我有些體會,扶了我一把,有叮一聲的感覺,現在亦陸續睇返你之前較早的。感恩能遇上~

  2. 我依家都遇到d好唔開心既事 我唔知點樣去解決。。。只可以等時間過
    咁啱就睇到呢篇文章,其實真係好似我,我好中意去作故仔,但我真係唔知點樣去停止自己去諗
    好彩睇到呢篇文章,暫時可以抒緩下我既不安感,同我會嘗試去改變自己
    但我依家面對既問題我真係唔知點解決

    1. Hi Regine,

      以下既講法唔知可唔可以減低你既痛苦,   但希望至少可以令你對生活更加正面。

      其實好多事情都係根據以下既 Formula A/B 去運行 :

      以前的我曾經在愛情上有過好大既挫折 ,   E 個問題令我好痛苦、當時的我當然唔知可以點面對點解決。之後我決定唔想再理 E 件事了 ,   之後去到某個點 ,   我發現這個問題已經不再是問題 ,   唔知點解 ,   個問題已經自我解決掉自己。我相信 E 個就係 Formula A apply 左落我身上。

      所以 ,   有問題唔知點解決點面對既情況下 ,   解決方法就係接受時差、接受解決方法會遲 1 點到 ,   但佢一定會到 !   同時間要盡可能做好自己、增值自己 ,   令自己有理由去相信 “變得更完美既自己” 一定可以比以前活得更好。以前一個 50 分既問題 ,   而家遇到一個 95 分既你 ,   冇可能唔會自我毀滅。

      我唔理你既問題係咩都好 ,   愛情、事業、健康、家庭..  你都有能力去面對 ,   你而家都仲活著就代表你有能力去 deal with 你既所有問題 ,   只係理智上 ,   你想變得更好 ,   但你唔確定係咪真係可以變得更好。

      所以問題只剩一個 :  就係你 e 刻相唔相信你潛在既能力 (The power of the universe , subconscious mind , God , 你中意點叫都好) ,   你相唔相信你一定可以解決到個問題。如果相信 ,   你將會進入 Formula A ,   你將會感到釋懷、放鬆、平靜、曙光。而 e d 感覺 ,   其實先係你一直想要既野 ,   而唔係只係將問題解決。

      因為唔知你煩緊咩 .   只能好概括咁討論 ,   不要介意 ,   希望可以令你舒服一點點 🙂

      P.S. 如果想搵人傾訴 ,   可以 Email 到 admin@unique-loa.com ,  或留言 ,   謝謝。

      Best wishes,
      Wei Feng

  3. 好多謝你既分享, 真系叮醒左我. 因為我正正系唸得太多太多, 作左好多好多故仔去嚇自己, 令自己唔開心, 真系開始意識到甘系一個好嚴重既問題.

    1. Hello ,  多謝你既留言丫!  好高興你能夠搵到阻礙你追求快樂既原因 ,  但 e 個只係第一步。

      好多人會誤以為明白左一個道理就等於學會左、或者已經足夠了 ,  但其實未夠的。

      可能你果刻會覺得成個人鬆晒、對人生更有信心、態度亦變得更加積極 ,  但我可以講 ,  e 個只能維持好短時間 ,  因為你會好快就會去反之前果個好負面既狀態。所以除左醒覺係唔夠的 ,  因為佢只係第一步。

      第二步 ,  就係要 “自覺”。如果過左 2 日後 ,  你發現自己又開始慢慢作故仔 ,  又開始好唔開心反 ,  其實你又反左去原地。

      雖然 e 刻你中於可以同自己講 :  “我既問題係因為作太多故仔”  ,  但充其量只能說你知道左 e 個事實 ,  而唔係學識左 e 樣野。因為真正既 “學會一個道理”  ,  係指問題在未來已經不會再出現了。

      所以我希望 ,  如果你而家知道左一樣新既概念 ,  唔理係咩都好 ,  你要努力將佢應用反出黎丫 !

      你都覺得自己諗得太多 ?  咁就要自覺停止諗太多 ,  唔好純粹知道就算 ,  因為 “純粹知道” 什至係更有害的。因為咁會令你覺得 ,  點解我學識左咁多野但都仲係咁唔開心 ?  然後就會慢慢進入比之前更絕望既狀態。但其實 ,  只係因為你未 “真正” 學會而已。

      我衷心祝你可以活得愈黎愈快樂 🙂

      (如果有問題或傾訴 ,  可以 email 到 admin@unique-loa.com ,  謝謝 :D)

      Wei Feng

    1. Kerry, 有咩事令你咁唔開心 ?   如果有需要可以同我傾訴喎 ,   我願意同你分擔一下。雖然未必解決到你既問題 ,   但希望可以令你舒服一點 

      Email : admin@unique-loa.com

  4. 我每日都過得好辛苦。每日一起身就有種唔開心既心情,唔想返工,好大壓力。我好似困住係一個唔屬於自己既身體入面咁,好痛苦。

    1. 其實我都係 ,  近排成日為左某 D 事煩 ,  但我發現 ,  唯一可以開心反既方法係當果 D 事情冇左既時候。 如果件事一直存在 ,  我只會一世都咁唔開心。當然我唔會想一世都唔開心咁過 ,  所以我唯有不斷搵辦法去令果 D 問題消失 ,  如果唔係  –  “問題永遠存在 ,  我永遠都唔會開心反”。

      所以如果可以的話 ,  諗下到底因咩事唔開心 ,  然後踏踏實實咁搵個解決方法出黎。過程係會辛苦 ,  但辛苦一時同唔開心一世 ,  你會簡咩 ?

      有事可以 email 我 admin@unique-loa.com 🙂

  5. 如果只係一刻嘅問題,你講得冇錯;但係如果一直不斷都係冇好結果,再強嘅信心都會有耗盡嘅一日,無可能無盡自high地同自己講希望在明天。

    1. 其實好多我地一貫有既諗法都值得去重新思考下 ,   正如你講既野已經有幾個對我同其他人好有用既思考位 ,   多謝你既 comment 😀

      (1)   首先 ,   如果一個人會認定自己既不幸會維持好耐 OR 永遠持續 ,   咁好可能佢打從一開始都已經唔係有信心了,   即使佢 “覺得” 自己有信心都好 🙁

      相反 ,   一個最理想既 mind state 係 :  即使而家淨係得壞結果 ,   但佢都唔會受 e d 野影響 ,   因為佢 “知道日後一定會變好” 。

      換句話講 ,   即係 e 個人既信心唔會因為而家既壞結果有所動搖 ,   因為 e d 壞結果o係未來根本一定唔會出現 !   咁仲駛乜唔開心呢 ?

      咁就會出現第 2 個思考點 :

      (2)   咁點解一直都只有壞結果出現 ?

      “你既思想處於咩狀態 ,   就會吸引到咩結果”

      根據 LOA ,   一個人身邊一直都只出現壞結果既原因係因為佢既思想一直都係處於壞既狀態。

      所以儘管佢覺得自己已經好 Positive 都好 ,   但對 LOA 黎講 ,   佢根本唔係 Positive。即使佢覺得自己已經盡晒力都好 ,   但事實上佢根本未出過力。

      可能係 e 個人用錯左力 ;  或者佢根本唔了解跟 LOA 溝通既語言。點都好 ,   佢既 mindset 確確實實出現左問題 ,   佢根本一路都對未來冇信心 ,   但以為自己係 “有信心左 ,   但只係情況冇改善”。

      然後就會有第 3 個問題 :

      (3)   “我真係有 positive 到 , 但點解壞情況一直都冇改善?搞到我既信心都慢慢下降”

      係因為時差。好多人學 LOA ,   覺得 e 樣野就好似 magic 咁樣 ,   只要試左一個月、一個星期、什至一日冇效果既話就會放棄 ,   然後覺得 LOA o係佢地身上唔 work。

      要知道 ,   大家想用 LOA 解決既問題通常都係自己最著緊既大問題 ,   阻力自然會大 ,   信心自然冇咁高 ,   解決既時間自然會較長。但代唔代表 Being Positive 冇用 ?

      因為一個人如果可以 keep 住 positive 、再加上適當既 action 的話 ,   雖然佢既處境未必即時有明顯改善 ;  但佢必會發現身邊有好多小煩惱好似開始自己消失左咁、會對之前看似冇可能既小問題開始看到機會。

      當佢見到 d 小問題真係開始有改善後 ,   信心會加強 ,   e 個先係開始去改變大問題既時機 ,   但通常大家未去到 e 個時候就已經放棄了 ,   所以就係點解好多人覺得 Being Positive (或者 LOA) 一開始看似有用但又冇效既原因。

      (4)   點解我覺得 mind state 正確的話 ,   壞結果一定會好轉 ?

      因為事實上 ,   其實只要轉一轉個 mind state ,   成個人好快就會變得輕鬆好多 ,   亦會易 d 吸引到好既事物。

      最簡單既體驗係試下留意下唔同既動物 ,   例如貓、狗、雀等等 ,   睇下佢地點樣無憂無慮好自在好自由好舒服冇任何煩惱咁活著 (佢地輕鬆個樣係絕對會令你好想打鍋佢的 但偏偏你就係想變成佢地咁) 。感受下如果你可以好似佢地咁既話 ,   人生會變得幾輕鬆舒服。

      其實不出 30 秒 ,   你已經會放鬆左 ,   係會發現自己有動力左 ,   positive 左 ,   e 個就係我一直想講既 mind state。如果 e 種輕鬆既感覺可以一路持續既話 ,   要不斷吸引壞既事物其實係一件好難既事黎..  所以 “一路只有壞結果” o係 e 個 mind state 下其實係近乎冇可能會出現的。 🙂

      雖然我地既睇法可能會唔同 ,   但我地唔係想比較邊個岩邊個錯 ,   如果我講左 d 你唔同意既野唔好介意 🙂

Leave a Reply

Your email address will not be published. Required fields are marked *